1Jo 1 | KYG | STEP | Lagaemo mago vekamo agi'amo Goti Ge'amo maige maige hu'a ne'maiya ya'mo aepa vekae'mo ava gemo huta mani avo'mo nekaone. Ani vekamo ali'ya'amo aepa fai'niya afinateti'mo maime maime eno mai'nigetae'mo ge'amo afiteta laulagafati'mo age'none. He, aulu haeta ageteta agufale'mo layateti'mo ame ali'none.

1 John 1

Maige maige huta maisuna ya'mo aepa vekae'mo ava gemo hu'niya gemae

1 Lagaemo mago vekamo agi'amo Goti Ge'amo maige maige hu'a ne'maiya ya'mo aepa vekae'mo ava gemo huta mani avo'mo nekaone. Ani vekamo ali'ya'amo aepa fai'niya afinateti'mo maime maime eno mai'nigetae'mo ge'amo afiteta laulagafati'mo age'none. He, aulu haeta ageteta agufale'mo layateti'mo ame ali'none. 2 Mani vekamo afa'a ne'maiya ya'mo aepa vekamo afole ai'nigeta agetetae'mo agaefe'mo faigoko ge'amo aeta hakalo huta lapa nepaune. Agaemo maige maige hu'a ne'maiya ya'mo aepa vekamo'a Goti muki ya'mo Afo'amo'e'mo magokepi lokaeno mai'neno lagaetegamo afole ai'niya vekaeke'mo ava gemo lapa nepaune. 3 Lagaemo afiteta age'nona kavafe'mo ava gemo hutae'mo lapakaemo lagae'e'mo afalu afalugana huta maisunafe'mo aeta hakalo huta lapa nepaune. Lagaemo Afotimo'e mafa'ne'amo Yesu Kalaisi'e'mo afalu afalugana huta ne'maune. 4 Lagaemo lapaipafi'mo lapamogaga aisaya kava'mo havai tesiyafe'mo mani avo'mo nekaone.

5 Goti Mafa'ne'amo'mo ina ge huno laha pai'nigeta afitetae'mo aeta hakalo huta lapa nepaune. Lapa paitae'mo Goti'a ha le ya'a'e vekamo mai'nigeno aipafi'mo hani ya'amo alagi ohane'niye, huta lapa nepaune. 6 Lagaemo hanipi'mo umenitata nehutae'mo, Goti'e'mo afalu afalugana huta lokaeta ne'maune, huta nehisunana aigofe gemo huteta lama gemo alagi akame nosune. 7 Lagaemo hanipi'mo umenitata osuta Goti'a aeno ha neleya yate'mo ne'maiya kava huta aeno ha neleya yategamo umenitata nehisunana agae'e'mo afalu afalugana huta mai'nonageno'ae'mo agaemo lagae'e'mo ani kava huno afalu afalugana huno ne'maigeno Mafa'ne'amo Yesu Kalaisi kola'amo'a muki hosu kavatimo aeno kalo paeno ne'atale.

8 Lagaemo, hosu kavatimo ohane'niye, huta nehisunana lagaitie'mo humi nelatonageno'ae'mo lama gemo laipafi'mo alagi nohane. 9 Lagaemo Gotife'mo, magufa hosu kava hu'nove, inagufa hosu kava hu'nove, huta aeta hakalo huta ha paisunageno'ae'mo alagi alino ataleteno, afa'a ateyo, nehuno'ae'mo muki hosu kavatimo aeno kalo paeno atalesiyafe'mo agaemo huguve, huno hu male'niya ge'amo alagi akame huno fatago kava'amo hugiye. 10 Lagaemo, hosu kava'mo osu'none, huta nehisunana ina ge huta Gotife'mo hutae'mo, aigofe gemo nehiya vekae, huta nehunageno'ae'mo lama gemo laipafi'mo alagi nohane.